dimanche 10 juin 2012

ملخر في تونس ما عندناش نخبة و لا طبقة سياسية اما عندنا شعب و يحيا الشعب و فقط




المعركة الحقيقية هي اسقاط النظام بالكامل و احلال مكانه نظام جديد يعني :
تغيير جذري للحياة في تونس تغيير ايجابي في الحكم الاقتصاد التعليم الفن الثقافة الرياضة وووو
اساس اجتثاث نظام الاستعمار من تونس هي المحاسبة و القصاص و اقصاء التجمعيين و استرداد الاموال من الخارج و مصادرة الاموال من الداخل و كتابة التاريخ الحقيقي للبلاد و صيانة هوية البلاد العربية و الاسلامية 
يا شيخ راشد الغنوشي اتق الله و اجبد روحك و اكرم لحيتك بيدك اصبح حزبك حزب علماني يحارب الاسلام بالاسلام و حزبك اصبح مرتع للخماج من القواعد للقيادات لا فلحتو لا في ثورة و لا في دين ؛ ربك الله و يرضى عليك كان الله لا امريكيا و لا الصف فاصل و لا رشيد عمار ؛ حزبك اصبح ماوى للتجمعيين و قبلة السراق و القفافة و اصبحنا نسمع من قياداتكم كلام كان يقولو بن علي و بورقيبة و الحداثيين في محاربتهم للدين ; نحترمو فيك و في حزبك لانه ينتمي للعائلة الاسلامية لكن وين نلوجو لا نفهموه لا اسلامي و لا ثوري و معرفناش حزبكم شنوا ؟ هو اخوان لا ماهوش اخوان 
هو سلفي لا مش سلفي ؛ هو علماني لا مش علماني ؛ هو ثوري لا مش ثوري ؛ هو عدو للثورة كيف كيف ماهوش عدو للثورة اما شنوا حزبكم و الله لا فهمناه اما ; قدام الدين لا نقدروك و لا نقدرو حزبك هاو ملخر و صلح حساباتك القبلة راهي مكة ماهاش الايباك و القاعدة هي الثورة مش النعاج الي يصفقولك ؛)
يا مرزوقي نقص من التفوريخ و الحكايات الفارغة و ركزلي عل المحاسبة و نضف حزبك و مستشاريك و التجلطيم طيحت قدرك و وليت كاراكوز راك و حزبك مشا هكاكة جرت المراهقة السياسية نتاعك تحب تولي رئيس هاك وليت رئيس اي شعملت ؟ جبت الصيد من وذنو ؟ مدور بيك مستشارين اقل ادمين عندنا يلعب بيهم لعب فيق على وضعك 
يا بن جعفر انت اصلا انا مانحكيش عليك حزبك اصلا حزب الجبناء ميحي مع الارياح انتي و الموجة حزب بيانات و حزب يساري لايت عامل فيها زعمة زعمة ثوري زايد الحديث عليكم مافهمتش فاش تعملو اصلا تتعارك مع الناس في التاسسيسي و الرسمي ما فما شيئ لا قوانين و لا تنقيحات و لا شيئ 
يا حمة الهمامي رغم اختلافي معاك الاديولوجي لكني نحترم نضالك و ثوريتك خليك راجل و مناضل و ابعد عن شكري بالعيد و التجمعيين و السبسي و رجال الاعمال الخماج خليك نظيف يا حمة و طور في فكرك و في مفهومك الشيوعي ابعد عن محاربة الدين و الحقد الاديولوجي و تو ترا كيفاش تعاون بلادك 
لبقية انتم خونة و انتم ديكور بن علي و ابواق برسبكتيف الارهابية اليسارية و اعداء للثورة منذ 13 جانفي و راكبين و جيتو مع التجمع و السبسي و اعلام العار و ضد القصبة و ضد الراجحي و ضد الفرياني و مع العجيمي و مع كمال النابلي و مع كمال اللطيف و تعملو في الاسلاموفوبيا و تحاربو في هوية البلاد و دين البلاد باسم الحداثة و الريق اكثركم اصلا من قياداتكم كفار و ناس ماتقراش القران و ناس تسكر في رمضان و ناس تع خمج و بلعات هذا بخلاف التامر و الحج للسفارات و المنظمات الاجنبية 

ملخر في تونس ما عندناش نخبة و لا طبقة سياسية اما عندنا شعب و يحيا الشعب و فقط

samedi 9 juin 2012

علاش ساكت يا جيش ماو وضح كل شيئ و علاش تخليو في الشك و الريبة ؟




قيادات من الجيش الوطني في التونسية في رد غير مباشر لتساؤلاتنا : 

انقد و تكلم و عبر لكن بالحجة 

الجيش لا ضرب قبل الثورة و لا قتل قبل الثورة و لاهو بش يضرب بعد الثورة و لاهو بش يقتل بعد الثورة 

و الجيش ما حبش يتسلم السلطة و شخص في الجيش هو الي ما حبش يقصد رشيد عمار

باهي كلامكم مطمئن و معقول لكن ماذابينا نزيلوا الشكوك و الريبة و نتكلموا بصراحة 

الشعب ما يكرهش الجيش بلعكس يحب الجيش لكن زادا مايحبش التقديس و خايف لا جيشنا يولي عندو دور سياسي وراء الستار كيما في الدزاير و تركيا لكن الشعب يحب يعرف حاجتين شكونهم القناصة و شنوا دور رشيد عمار في 14 جانفي و علاش تقلقو في المدونين و المشرفين بفكان الكاميرا و بدعوة المشرفين للتحقيق و بصنصرة صفحات فايسبوك و علاش المحاكم العسكرية ماتحكمش على المجرمين و القناصة ؟ ؟ 

علاش ساكت يا جيش ماو وضح كل شيئ و علاش تخليو في الشك و الريبة ؟ 

باهي اجمالا باهي كي تحركتو و تكلمتو اما راو مشكلكم مش معا رمزي كشخص اما مع ما يطالب به رمزي نفترض انه عندو غايات سياسية و لاعبين بيه كيما تحكيو و احنا كشعب نحبو نعرفو كل شيئ و الي عندنا تحفظات ؟ شكون يجاوبنا ؟ 

القضية ماهاش شخصية راهي ؛ لو كانت شخصية مع رمزي عمركم لا كنتم تراو تعاطف معاه من التيارات الكل من المسيس و الي مش مسيس و من الي عندو غايات للي ما عندوش غايات ؛ الحل الوحيد هو الحقيقة و المحاسبة و المصارحة لا اكثر لا اقل هكاكة تتكشف الاوراق الكل و نعرفو كوعنا من بوعنا و نسكرو الدوسي

samedi 2 juin 2012

مساج للترويكا






نحب نقول للحكومة نحن نكره المعارضة و نتعاطف معاك لكن ما يمنعش الي احنا ماناش راضين لا عليك و لا عليهم و لا على الوضع ؛ و حتى كي صوتنالكم خاطر لقينا رواحنا وحدنا في الشارع قلنا لعل انتم تقدروا اكثر منا




لكن هاو بش نقلكم فما حالة احباط و حزن عند الشعب و حتى اتباعكم من :




-الانبطاحية

-التنبدير تع اتباعكم

-وليتو انتوما كيف المعارضة ايام الانتخابات كل ما يطلعو في التلفزة ولا في الاعلام النهضة عملت و النهضة بش تعمل و انتوما الان تعملو في نفس الشيئ المعارضة بيها و المعارضة عليها




فادين منكم اكيلي بالظبط و لا حول و لا قوة لنا الا بالله خاطر شعبنا راقد لكن كان شعبنا يقوم تو نبعثوكم و نحققو اهداف ثورتنا وحدنا




مطالبنا لا تحكيولنا على مؤامرات و لا على فشل المعارضة مطالبنا هي :

-اقصاء التجمعيين و المحاسبة و تطهير القضاء المدني و العسكري

-و محاكمات ثورية و الاعدام لمن قتل و السجن لمن سرق

-استرجاع اموالنا و مصادرة اموال السراق

-تطهير كل الادارات و الاسلاك

-طرد التجمعيين من احزابكم و من حكومتكم

-ارجاع الجيش للثكنات و رفع حالة الطوارئ

-التقليص في اجور التاسيسي للنصف

-سحب رخص احزاب التجمع

-دستور يصون الهوية و الحريات العامة و الفردية و يؤسس لدولة قانون لا احد فيها فوق القانون و لو كان رشيد عمار شخصيا

-تنمية عادلة و الاولوية للجهات المحرومة

-و انتقال ديمقراطي و انتقال سلمي للسلطة

-سياسة خارجية مستقلة عن امريكيا و قطر و القرضاوي و تكون سياسة تعبر فقط عن شعب تونس المسلم العربي المدافع عن قضايا امته و المقاومة

هاو علاش انتخبناكم و هاو علاش فادين عليكم بالضبط و لكن للصبر حدود للصبر حدود للصبر حدود




نراو مصر اليسار و الاسلاميين و القوميين جبهة وحدة ضد التجمع نتاعهم و نراو حالكم يا سياسيينا نشعر بالحزن كل الحزن