تعلم يا شعب تونس شمعناها ثورة

تعلم يا شعب تونس شمعناها ثورة 

كمشة كرايك شادين انهار و ليل النهضة ما النهضة و مسيبين التجمع و الفساد ترتع 

انتي تفد و هوما 24 ساعة في النهار يا بوڨلب نفس اللغة يوميا 

الي بيه تتظاهرو ضد الحكومة كاينها عدوة جات بالدبابات و تصورو فيها عدوة للشعب و هابطين بش طيحوها جاينها يتيمة الحكومة و ما انتخبها حد و البلاد مسيبة على ڨرنكم ؛ الي يحب يتظاهر يطظاهر ضد التجمع ضد القناصة ضد السراق مش ضد ناس جابهم صندوق و مناضلين غلطو ولا لا بهايم ولا منبطحين ماهمش اعداء للشعب 

عدو الشعب الي اليوم يدافع عن حقبة بورقيبة و بن علي و يلقالها التصنيفات 

عدو الشعب الي ما عندوش مبدا البارح ضد السبسي و اليوم مع السبسي جيست شماتة في النهضة كاينها النهضة هي الي سرقتكم و قتلت اولادكم و حطتكم في الحبوسات ؛ ما تخافوش النهضة ماهاش بش تقص عليكم الشراب و البلعة و السهريات لانها اسلامية بالاسم 

حاصيلو ملخر الحيدث زايد اما تعلمو شمعناها ثورة ؛ عامناول نبرحو اهبطو للشارع اهبطوا للشارع قدام عينيكم سرقة الثورة من محمد الغنوشي و السبسي و نجيب الشابي و احمد براهيم و الشلة و قدامكم الناس كانت تتضرب بالڨاز و بالكرتوش وقت السبسي و الغنوشي و قدامكم كان الاعتقالات و كان قمع الصحافة و غيره ما تكلمتوش و ما هبطوش للشارع توا وليتو ثوار ؟ تحبو نعملو ثورة جديدة اوكي اما نقصو الريوس المرة هذي و تعرفو ريوس شكون بش تتقص ؛ افشلتو الثورة و توا تحبو تلبسوها للمرزوقي و النهضة ؟ غالطين و بهايم و منبطحين و الي تحبو انتوما احنا جبناهم و احنا نتحاسبو معاهم ؛ انتوما اخترتو الصفر فاصل اركش على روحك ؛ نحن انتخبناهم و احنا الي بش نهبطولهم للشارع و نفرضو عليهم تحقيق اهداف الثورة بالسيف 

تفرجو على مصر و تعلمو ؛ طلع واحد من ازلام مبارك و من العسكر هبط الشعب للشارع و اعداء الاسلاميين اليساريين و القوميين اتحدو ضدو ؛ اما احنا كرايك ولاد السراق و ولاد البورجوازية الي يتقززو من حاجة اسمها اسلام و اسلامية و ناس تدافع عن علمانية ناقمة كيفاش الشعب اختار اسلاميين ؛ لاكم تعارضو لتحقيق اهداف الثورة و لا زمارة و تتهمو في الناس بالطبالة و انتم اكبر كذابة و تافهين اخبار صفحاتكم و اعلامكم كان كذب 24 ساعة في النهار و كان تشعيل النار في حكايات بيدونة اما الرسمي ما تتكلموش عليه هاو يحكيو عل الشراب هاو النهضة عملت هاو المرزوقي عصفور و كانالو ؛ تافهين و الله 

الي يحب يحقق اهداف الثورة يحارب التجمع و التجمعيين و الي قتلو الي سرقو و الي نهبو و الي سكرو الجوامع و نحاو الحجاب و حطو الصحافيين في الحبوسات و هجرو التوانسة و سرقو ارزاق الناس و همشو ولايات الداخل وووووو

ماينجمش يكون ثوري الي تربا في دار تجمعية و دستورية و بورجوازي و سهار و عايش عامل بون كيف

مايقلقوش هذا و هذاكا يستميت في الدفاع عن المنظومة القديمة الي تحفظله حقوقه 

فما ناس في تونس تناضل من اجل اهداف الثورة معارضين للحكومة او موالين 

و فما ناس تناضل من اجل ان تكون كلمة الله هي العليا 

و فما ناس تناضل من اجل ابقاء النظام القديم و تناضل من اجل البلعة و المايو و الشيخات 

و اكثر الي اصواتهم مسموعة خاطر ما يحشموش هوما الي 50 سنة تراو فيهم و تسمعو فيهم توا تراو فيهم في لووك 2012