صباح الخير سي المرزوقي و سي الجبالي و سي بن جعفر

صباح الخير سي المرزوقي و سي الجبالي و سي بن جعفر 

اليوم الاثنين نهار جديد و تبداو الخدمة بكري عاد قلت نذكركم بالكلتمين هاذوما قبل ما تغطسو في دوسياتكم و تدور بيكم مستشارين الهانة و رڨود الجبانة

الشعب هذا الي اسمو الشعب التونسي عمل ثورة و جابكم للحكم و قبل ما يجيبكم للحكم خرج للشارع و تضرب بالكرتوش لاسقاط النظام و للحرية و الكرامة و التشغيل و كلمة اسقاط النظام ما تعنيش تغيير الحكومة و الرئيس و البرلمان فقط و ما خرجش الشعب للديمقراطية الديمقراطية طلعتو بيها انتم السياسيين لكن احنا كشعب ماناش ضدها مادام بش تحققلنا مطالبنا 

لذلك حبيت نذكركم بشمعناها الشعب يريد اسقاط النظام : يعني القطع التام مع الماضي سياسيا اقتصاديا ثقافيا و تغيير كل شيئ في البلاد ؛ لا حاجتنا بوجوه قدم و لا حاجتنا بتجمع و لا تجمعيين و لا بشعارات بن علي و لا بكلام نخبة بن علي و لا بنظام المجتمع تع بن علي و بورقيبة

لذلك اول حاجة تبداو بيها تطيرو وجوه اللوح التجمعية من مكاتبكم و من احزابكم و تيييو من الريق البارد و البهامة و زادا حاجة اخرى مستعجلة تكلمو هاك البحيري تع وزارة العدل يشوف حل في تطهير القضاء خلي نبداو نحاسبو الي قتلو اولادنا وقيت راهو ماكانش بدلوه حاجة اخرى بش نوصيكم عليها قبل ما تبداو الاسبوع الجديد هذا ؛ لغة المؤامرات و الاستقرار و كل ما تطلعو تتكلمو تكلمونا كان عل الفلوس و الاقتصاد نقصو منها ؛ هاتو الرسمي وقتاش المحاسبة ؟ وقتاش بش تبداو باحزابكم ساعة نتوما ؟ جبتولنا العار بالبهامة و بالسقاطة نتاعكم ؛ يبدا نحن ننتخبوكم بش تڨطعو التجمعيين و تحاسبو السراق نلقاوكم جايبينهم بحذاكم و تتعاملو معاهم ؟ القناصة وينهم ؟ و وينهم الي قتلو قبل 14 جانفي ؟ شاهي مريرة يا مرزوقي و يا جبالي و يا بن جعفر كي نرا وجوهكم في التلفزة تحكيولي عليهم غلبتو عليا و الله