سرقت ثورة الكرامة و اصبحت بالفعل ثورة ياسمين

سرقت ثورة الكرامة و اصبحت بالفعل ثورة ياسمين
كي نقولو ثورة الياسمين يعني ثورة نقنوقية تع توريست و ريق بارد
افرغت الثورة من مضمونها الي هو التغيير الجذري و القطع التام مع الماضي في شتى المجالات
و اصبحت ثورة تحقيق الاستقرار و التشغيل و اختزلت في سبان الاعلام و هو ليس بريئ على فكرة
لم نعد نسمع بالمحاسبة و تاميم القطاعات الاستراتيجية و استرجاع الاموال المنهوبة اصبحنا نستجدي السراق ان يشغلو ابنائنا ؛ اصبحنا عاجزين ان نقول الي فما قناصة و الي القضاء و الجيش و الداخلية لازمهم تطهير ؛ اصبحت قطاعات واسعة من شعبنا وين ترا صورة شهيد او جريح تشتمه و اصبح الناس يتحسرون على بن علي
تحولت الي ثورة ياسمين وقتلي ولينا في بلاصة مانرجعو فلوسنا الي لبرة اصبحنا نلحلحو بالخارج بش يعطينا
اصبحت ثورة اضحوكة بعد ان التجمعيين يطلعو عيني عينك و يطالبو بحقهم في الثورة و يههدو و يقولو بكل الوقاحة انهم شاركو في الثورة ؛ الثورة تشلكت لما البوليس عمل نقابة و اصبح صاحب حق في البلاد و يهدد بينما هو الي قتل و قمع و سرق الشعب قبل و ايام الثورة و بعد الثورة و خيانتهم الي وقتلي البلاد في فراغ تركو اماكنهم و هبط الشعب للشارع لحمي بلاده ؛ اصبحت ثورة بك لما نخبة بن علي بعد ما تخباو عاودو خرجو من جحورهم بكل الوقاحة و الرقعة و ينظرو للشعب
انا لا الوم لا حكومة و لا غيرو انا نلوم الشعب السلبي ؛ الشعب الي بعد القصبة ترك القضية و وين نقولول اخرج يعطينا بظهرو ؛ انا الوم الشعب الي اصبح يسب في الثوريين و يستمع لاعداء الثورة الي لعبولو على الوتر الاديولوجي و حولو اهداف الثورة لحرب هوية ماكانت مطروحة اصلا ؛ انا احمل الشعب المسوولية لما يرا في الفاسدين و ساكت عليهم كيما سكت 23 سنة ؛ انا الوم الشعب لما قيس بن علي يتسيب و كيما تسيبت قبلو السيدة العڨربي و اخت المخلوع و غيرها و بقا يتفرج و لاهي في البحورات و الشيخات و التنبير و بعد يقول ويني ثورتي ؟ وينكم وقتلي جرحاكم مطيشة و وينكم وقتلي مناضليكم تتسب من بن تيشة و من امثاله ؟ شعب يشتمه جلال بريك و يسمعو ؛ شعب يسمع لوزير الضغط و السكر و لكمال مرجان مايستحقش ثورة ؛ نحمد ربي الي بن علي طلع جبان و هرب ولا رانا لليوم نقاسيو ؛ لومو رواحكم سلبيتكم و جهلكم هو سبب البلاء ؛ ثقافة انا خبزيزت نحب ناكل هي سبب الداء ؛ كيما قمعكم بن علي و بورقيبة انتم شعب قابل للقمع لانكم انتم من تعطيو بظهوراتكم بش الناس تركبكم ، هذه الحقيقة برجولية فما 10% جابولكم ثورة ماكنتوش تحلمو بيها ؛ فما 10% كانو سبب بش رتحوكم من بن علي و الطرابلسية و التجمع و الشعب و البوليس السياسي و حررولكم الاعلام حتى و هو مسخ و فما 90% بالسلبية نتاحها باعت القضية و باعت الثورة و تخمم كان في الماكلة و الشيخات و نسات الكرامة و اهداف الثورة ؛ كملو ارقدوا غدوة تتقمعو و بعد ابداو اتبكاو