هذه حقيقتنا

بعد الثورة قاعدين نكتشفوا في حقيقتنا الي اخفاها المخلوعين و اعلام العار و نخبة النظام و علماء السلطان و احباء التقدمية ؛قاعدين نكتشفوا من التعليقات في الفايسبوك و من الضيوف في البرامج التلفزية و من المظاهرات في الشارع قاعدين نشوفوا في الاخلاق الفاضلة و الذكاء المفرط للشعب التونسي و التمدن و التحضر و الرحمة و كل ما تباهاو به 55 سنة
بهامة غير عادية ؛ قلة تربية ناس في التلفزة الي حبلة من الحرام و الي خاطف مرا من دارهم و الي تجيب في الزطلة من الحدود و الي يكفر في ربي في الراديو و الي ماشية للغريبة تلوج على راجل و المتحجبة الي هازة المطرقة و المنجل و الاسلام المتاصل الي مايستحقوش شكون يعلمهولهم و الدكاترة الي مايعرفوش يعملو جملة و الي مل الڨلڨ يجيب 5 صغار
انا هنا نتسائل ويني الدولة الحديثة و التعليم و الصحة و التحضر و التمدن ؟ اول حاجة لازمنا نصارحو رواحنا شنية عيوبنا و شنية حقيقتنا بالظبط يا شعب الخبز و ما و بن علي لا و حرية و كرامة وطنية و شعب مسلم و لا يستسلم ؛ يزيو مل الكذب الحقيقة مرة و حقيقتنا عكس الي نقولو فيه على رواحنا ؛ بش تتقدم لازمك تعرف المرض و تعالجو ؛ الثورة هزت النظام و فضحتنا زادا و عرات ال 55 سنة جهل و تخلف و بهامة و سطوكية و خاصة دعوة و تفشفيش بالفارغ